Peritoneal xərçəngin klassik müalicəsi intravenoz kimyaterapiyadır.  Bağırsaq keçməzliyi olduğu hallarda, bağırsağın bir seqmenti ilə tıxanmiş sonrakı seqment arasında baypas əməliyyatı kimi cərrahi müdaxilələr tez-tez həyata keçirilirdi.

Periton mayesinin (ascites) olması halında, maye istehsalını azaltmaq və bədəndən çıxarılmasını artırmaq üçün dərmanlar təyin edilirdi, eyni zamanda xəstənin simptomatik rahatlığı üçün qarın boşluğundan maye çıxarılırdı (parasentez və ya punksiya). Belə müalicə ilə xəstələrin sağ qalma müddəti 3-18 ay arasında olurdu və onların həyat keyfiyyəti aşağı idi.

Lakin son 25 il ərzində peritoneal xərçəngin müalicəsində yeni bir metod tətbiq olunmağa başlanmışdır. Bu, bütün görünən şişlərin çıxarılması (sitosreduktiv cərrahiyyə) və daha sonra Hipertermik İntraperitoneal Kimyaterapiyanın (HIPEC) aparılmasıdır.

Bütün dördüncü mərhələ xərçənglər eyni deyil və nəticə şişin yayılma dərəcəsindən asılıdır. Xərçəngi yalnız bir orqana, məsələn, yoğun bağırsaq xərçəngində qaraciyərə və ya yumurtalıq xərçəngində peritona yayılmış xəstələrdə nəticələr daha yaxşı olur. Peritoneal implantları (şiş ocaqları) olan xəstələrdə isə xərçəng çox vaxt qaraciyər və ya ağciyərlərə yayılmış olur. Lakin bəzi xəstələrdə yayılma yalnız peritonla məhdudlaşır.